أفكار قيمة بالنسبة لي كتشد المصروف الجزء الثاني، المصروف،أفكار قيمة، لي كتشد المصروف،تقدية ديال الخضرة،التدبير المنزلي،جدول الأكل الأسبوعي،جدول الطعام الأسبوعي،
السلام عليكم و رحمة الله
موقع مجلة مولاة الدار لكل ما يهم المرأة العربية molatdar.ma
يقدم لك سيدتي : أفكار قيمة بالنسبة لي كتشد المصروف الجزء الثاني.
أنقر هنا لرؤية الجزء الأول >>>>>>>>>> الجزء الأول
موضوع حول التقدية ديال الخضرة:
حبيباتي غادي نحط ليكم طريقتي فالتقدية ديال الخضرة
اولا انا مقسما الشهر على 3 يعني كل 10 ايام تنتقدا و تنربح 50درهم تنديرها فواحد البزيطيم دابا نقولكم اشنو تندير بلفلوس لي تنجمع فداك البزطام
كاين لي غادي تقولي انا تنتقدا من السوق و ما عنديش كندير نتقدا كل 10 ايام. راه حتى انا تنتقدا من السوق و لكن ما تنقيس الخضرة لي جبت من السوق حتى دوز 3 ايام عاد نبداها .تنجيبها نغسلها و نرتبها فالثلاجة. اهم حاجة قبل ما تمشي للسوق وجدي جدول طعام ديال 10 ايام لي جاية. هادي اهم خطوة حيت ملي تتكوني عارفة اشنو غادي طيبي غادي تقداي على داك الاساس و ما غاديش تبقاليك الخضرة تضيع.
مثلا هادا جدول طعام ديال 10ايام:
اليوم الأول
لغداطاجين بالدجاج و بطاطا و خيزو والجلبانة و الديسير سلطة فواكه+ كاسكروط ملوي و اتاي+ لعشا حسوة بلحليب
اليوم الثاني
لغدا عدس و فريت فالفرن و عصير ليمونة وحامضة+ كاسكروط بطبوط و قطع كيكة وفرماج وزيت واتاي+ لعشا طورطية ديال بطاطا و شيفلور
اليوم الثالث
مريقة باللحم وبطاطا و اللوبيا خضرا وعصير الليمون وبنانة+ كاسكروط خبز وزيت وفرماج وكونفيتور واتاي+ لعشا سفة ديال الروز بالزبيب و اللوز
اليوم الرابع
معقودة وزعلوك وسلطة مغربية و كاشير منزلي و سلطة فواكه+ كاسكروط كرصو خبز و فرماج واتاي+ لعشا سندويتشات
اليوم الخامس
لغدا كسكس و اللبن+ كاسكروط كرواصة وشنيك وخبز وفرماج والزيت واتاي+ لعشا اومليط كاشير
اليوم السادس
لغدا حوت فالفرن وتكتوكة وخضرة مفورة و عصير الليمون+ كاسكروط خبز وزيت ولفرماج ولكونفيتور+ لعشا مقارونية
اليوم السابع
لغدا طاجين بالدجاج وخضر و عصير حامضة وليمونة+ كاسكروط ملوي و حليب و قهوة+ لعشا بيتزا
اليوم الثامن
لغدا لحم الراس بالحمص و رايب بالفواكه+ كاسكروط كرص و قطع كيكة و خبز واتاي وفرماج+ لعشا بريوات بطاطا والفرماج
اليوم التاسع
لغدا كراتان خضر و سلطة ارز بالطون و عصير حامضة+ كاسكروط لخبز والزيت و الفرماج والكونفيتور و اتاي+ لعشا شندويتشات
اليوم العاشر
مريقة دجاج ببطاطا و الجلبانة وعصير الليمون والحامض وخيزو+ كاسكروط حرشة واتاي+ لعشا روز بالحليب و التمر.
اوا يا لالة ملي توجدي الجدول شدي ورقة وستيلو وشوفي كل وجبة شحال غادي يخصك فيها من كل حاجة مثلا شحال ديال بطاطا تقريبا خاصك فالطاجين و غادي تعرفي تقريبا شحال ديال الخضر خاصك وماغاديش تبقا تشيط ليك الخضرة او تشريها و ما تستعمليهاش كاع مثلا كاينة لي ملي تتشوف شي خضرة تتعجبها بحال البسباس تشريه و حتى واحد فولادها ما تياكلو و تتخليه حتى يلوى و ترميه
اوا هاهي طريقتي فالتقدية ديال الخضرة.
ملي تنمشي للسوق تندي معايا وريقة فيها الخضر لي محتاجة وكل وحدة شحال من كيلو خاصني منها و ماتنساوش ديرو فحسابكم واش ديك الخضرة غالية ولا رخيصة فداك الفصل و من الافضل تكونو تخضرو بالخضر ديال داك الفصل لي نتوما فيه حيت تتكون صحية اكتر ورخيصة حيت كتيرة اما الى مشيتي تشري الملوخية فشهر 1 راه غادي تلقايها تتشوي بلغلا.
مثال ديال التقدية تالخضر لي تنجيب من السوق:
كيلو ونص بصلةملي تتكون غاليةتنجيب هاد كيلو ونص ب 5 دراهم و ملي تتكون رخيصة تنجيب3كيلو ب 4.5دراهم يعني تقريبا تنتقدا بنفس الثمن تنلعب غير على الكمية
4كيلو بطاطا الى رخيصة تنجيب هاد 4 كيلو ب8دراهم و ملي تتكون غالية تنجيب 2 كيلو ب10دراهم
كيلو ونص مطيشة ب5دراهم
نص كيلو اللوبيا خضراب 4دراهم
كيلو خيزو ب 3دراهم
نص كيلو كورجيط ب3دراهم ملي تتكون غالية اما فالصيف را شي ملرات تنجيبها غير ب2دراهم للكيلو
درهم مكور
كيلو فلفلة حلوة ب 4دراهم
الربيع 3دراهم
2 كيلو ليمون ديال العصير ب 4دراهم
نص كيلو حامض ب2.5دراهم
نص كيلوبنان ب4.5دراهم
هادشي راه غير تقريبا باش تيتكون عندنا الخضرة فتينجداد اما مكناس راه لخضرا رخيصة بزاف. لمهم الى شاطت ليكم واخة غير 10دريال ديروها فداك لبزيطيم مع ديك 50درخم لي حيدنا من الاول و لي شاطت ليك من التقدية ديريها فداك لبزيطيم وملي يتسالا الشهر غادي تلقاي فلوس البوطات وتقدي تلقاي حتى باش تشري مثلا نيدو او فرماج احمر لمهم شي حاجة من الكماليات اوا يا لالياتي هادي هيا طريقتي باش تنتقدا و راه تنطيب غير لقياس و ما تنرمي والو.
تقدية اللحوم:
كيلو اللحم الراس يقسم على 3 و2 كيلو الدوارة تقسم على 3 كنطيبهم نهار الاربعاء كيلو اللحم يقسم على 4 واحد الدجاجة تقسم على 5 اجناح الكبدة كتخبعوهم للشوربات او ليباط الخ….
